MANILA, Philippines- Pinangalanan si Police Maj. Gen. Edgar Alan Okubo bilang number four man ng Philippine National Police (PNP) kasunod ng pagkakatalaga niya bilang acting Chief of Directorial Staff sa pinakabagong balasahan ng matataas na posisyon sa police organization.
Epektibo ang pag-upo ni Okubo sa number four post ng PNP sa Miyerkules, Oktubre 9.
Kabilang si Okubo sa PNPA Class of 1992 at nanungkulan bilang direktor ng elite Special Action Force (SAF), at direktor ng National Capital Region Police Office (NCRPO).
Papalitan siya ni Police Maj. Gen. Leo Francisco, isa ring PMA graduate, bilang direktor ng Civil Security Group.
Sa isa pang reorganization order ni Marbil, dalawang senior officials ang itinalagang regional directors sa Visayas at Mindanao— Police Brig. Gen. Jay Cumigad bilang direktor ng Police Regional Office 8 sa Eastern Visayas at Police Brig. Gen. Romeo Juan Macapaz bilang hepe ng Police Regional Office-Bangsamoro Autonomous Region.
Si Cumigad ang humalili kay Police Brig. Gen. Reynaldo Pawid na itinalagang deputy director of the Directorate for Operations habang si Macapaz ang papalit sa pwestong nabakante ni Police Brig. Gen. Prexy Taggawohn na siya namang bagong officer-in-charge ng Area Police Command- Northern Luzon.
Samantala, itinalaga si Police Brig. Gen. Nestor Babagay, Jr. bilang bagong pinuno ng Police Security and Protection Group (PSPG) habang si Frankie Candelario ang acting director ng PNP-Intelligence Group.
Sa inaasahang pag-upo ni Nartatez sa number two post ng PNP sa Miyerkules, papalitan siya ni Police Maj. Gen. Sidney Sultan Hernia bilang NCRPO director.
Nanungkulan si Hernia bilang direktor ng Police Regional Office-Mimaropa, direktor ng Anti-Cybercrime Group at pinuno ng Directorate for Personnel Records and Management.
Itinalaga rin ni Marbil si Police Brig Gen. Benjamin Sembrano bilang acting director ng PNP Forensics Group habang si Brig. Gen. Constancio Chinayog, Jr. ang kahalili ni Hernia bilang DPRM head.
Inilagay naman ni Marbil si Police Col. Jeffrey Decena bilang acting deputy regional director for Administration ng Police Regional Office 3 sa Central Luzon na kasalukuyang pinamumunuan ni Police Brig. Gen. Redrico Maranan. RNT/SA
