MANILA, Philippines – Inihayag ng mga grupo ng simbahan at civil society na gaganapin ang ikatlong Trillion Peso March sa Pebrero 25 sa EDSA Shrine, bilang paggunita sa ika-40 anibersaryo ng EDSA People Power Revolution.
Ang martsa ay inorganisa ng Caritas Philippines, Buhay ang People Power Campaign Network (BAPP), at Simbahan at Komunidad Laban sa Katiwalian, na nakatuon sa tatlong haligi: paggunita sa nakaraan, pagtugon sa kasalukuyang isyu, at pagsusumikap para sa isang hinaharap kung saan maisasabuhay ang adhikain ng people power.
Binanggit ni Caritas Executive Director Fr. Tito Caluag ang “tumultuous past year” na dulot ng flood control scandal bilang isang pagkakataon para muling gisingin ang kamalayan ng publiko sa tungkuling sibiko.
Kasama sa mga pre-event na aktibidad ang isang protesta sa Pebrero 23, sa araw ng confirmation of charges hearing ni dating Pangulong Rodrigo Duterte sa ICC.
Ang pangunahing programa sa Pebrero 25 ay magsisimula sa prayer march mula Edsa Shrine hanggang Club Filipino, susundan ng programa sa People Power Monument, at isang Misa sa Edsa Shrine na pamumunuan ni Lingayen-Dagupan Archbishop Socrates Villegas.
Sa buong bansa, 86 Catholic dioceses ay gaganap din ng kani-kanilang programa ng paggunita.
Binigyang-diin ni BAPP convenor Kiko Aquino-Dee na nasa publiko ang pananagutan sa paglutas ng mga suliranin ng bansa, at na ang Edsa ay patuloy na puwang para sa talakayan at paghiling ng reporma.
Kasama sa mga panawagan sa martsa ang anti-dynasty at party-list reform, paglilitis sa mga sangkot sa flood control scandal, pagbawi ng ill-gotten wealth, hustisya para sa mga biktima ng extrajudicial killings, at pagtatapos ng historical revisionism. Santi Celario
