MANILA, Philippines – Naglabas ng red notice ang International Criminal Police Organization (Interpol) laban kay Ronalyn Baterna, documented corporate secretary ng Philippine Offshore Gaming Operations (POGO) firm na Lucky South 99, ayon sa Presidential Anti-Organized Crime Commission (PAOCC).
Sa isang press conference ng Kapihan sa QC noong Linggo, sinabi ng tagapagsalita ng PAOCC na si Winston Casio na natanggap ng gobyerno ng Pilipinas ang red notice ng Interpol laban kay Baterna sa pamamagitan ng Philippine Center for Transnational Crime.
“Natatanggap ng ating bansa ‘yung red notice nitong 13 ng Oktober at natanggap ng aming opisina ng PAOCC nung nakaraang linggo,” saad ni Casio.
Nauna nang sinabi ng PAOCC na si Cassandra “Cassie” Li Ong, ang dokumentadong kinatawan ng Lucky South 99, ay huling natunton sa Japan at nasa red notice na ng Interpol.
Sinabi ni Casio na makikipag-ugnayan ang PAOCC sa Department of Justice at National Bureau of Investigation upang ang mga kinauukulang ahensya ng gobyerno ng Pilipinas ay makipagtulungan sa kanilang mga foreign counterparts hinggil sa pag-aresto kay Baterna at Ong.
Ang dalawang babae ay may warrant of arrest para sa qualified human trafficking kaugnay ng umano’y scam hub na pinamamahalaan ng Lucky South 99 sa Porac, Pampanga.
Ayon sa PAOCC, nakahanap sila ng ebidensya ng torture, kidnapping, at sex trafficking sa site, dahil nailigtas ng mga awtoridad ang hindi bababa sa 158 dayuhang empleyado.
Itinanggi ng Lucky South 99 ang mga paratang.
Nauna nang sinabi ni Baterna sa Quad Committee (QuadComm) ng House of Representatives sa isang pagdinig na nag-isyu siya ng mga tseke sa mga kliyente ng Lucky South 99, at ang pinakamalaking halaga ng tseke na inilabas niya ay nagkakahalaga ng P500,000.
Ang pera para sa mga tseke, ani Baterna, ay mula kay Ong. RNT/MND
