MANILA, Philippines – Umakyat na sa 16 ang naiulat na bilang ng mga nasawi dahil sa Tropical Cyclone Enteng at Southwest Monsoon o Habagat, ayon sa National Disaster Risk Reduction and Management Council (NDRRMC) nitong Biyernes.
Sa ulat nitong alas-8 ng umaga, sinabi ng NDRRMC na walo sa kabuuang nasawi ang naiulat sa Calabarzon, tatlo sa Bicol Region, dalawa sa Central Visayas, dalawa sa Eastern Visayas, at isa sa Western Visayas.
Binanggit ng NDRRMC na ang mga naiulat na pagkamatay ay nakahanda pa para sa validation.
Samantala, idinagdag ng NDRRMC na 17 katao ang naiulat na nawawala at 13 iba pa ang nasugatan dahil sa epekto ng sama ng panahon na nagdulot ng pagbaha at pagguho ng lupa sa iba’t ibang bahagi ng Luzon at Visayas.
May kabuuang 2,061,726 katao o 538,602 pamilya ang naapektuhan ng Enteng at Habagat sa Ilocos Region, Cagayan Region, Central Luzon, Calabarzon, Bicol, Western Visayas, Central Visayas, Eastern Visayas, Cordillera, at Metro Manila.
Ang Bicol Region ang may pinakamaraming bilang ng mga apektadong residente na may 1,119,382.
Iniulat ang pinsala sa imprastraktura na nagkakahalaga ng P223,602,718 at sa agrikultura na nagkakahalaga ng P4,333,159. Para sa mga pasilidad ng irigasyon, nasa kabuuang P1,080,000 ang halaga ng pinsalang naiulat.
May kabuuang 5,965 na bahay ang nasira — 5,858 ang partially at 107 ang totally.
Ang pagkawala ng kuryente, problema sa suplay ng tubig, at mga isyu sa linya ng komunikasyon ay naranasan sa iba’t ibang lugar sa gitna ng pananalasa ng Enteng at Habagat.
Na-stranded ang ilang pasahero dahil sinuspinde ang ilang flight at biyahe sa dagat dahil sa masamang panahon.
Sinuspinde rin ang mga klase at iskedyul ng trabaho sa iba’t ibang lungsod at bayan sa bansa.
Idineklara ang state of calamity sa Naga City, buong lalawigan ng Camarines Sur, at bayan ng Allen sa Northern Samar.
Sa ngayon, nasa P92,636,750 ang tulong na naibigay sa mga biktima, ayon sa NDRRMC.
Lumabas si Enteng sa Philippine Area of Responsibility noong Miyerkules ng umaga. RNT
