MANILA, Philippines – ITINALAGA ni Pangulong Ferdinand Marcos Jr. si Ma. Belen Ringpis-Liban bilang bagong presiding justice ng Court of Tax Appeals (CTA).
Pinalitan ni Ringpis-Liban si dating CTA Presiding Justice Roman del Rosario, bumaba sa puwesto noong Oktubre 6 matapos na maabot ang mandatory retirement age na 70.
Bago ang kanyang appointment, nagsilbi si Ringpis-Liban bilang CTA associate justice.
Sa loob ng 17 taon, nagtrabaho si Ringpis-Liban bilang Regional Trial Court judge sa Malolos at Quezon City. Nagsilbi rin siya bilang solicitor sa Office of the Solicitor General at bilang isang confidential lawyer sa Court of Appeals.
Nagtrabaho rin siya bilang legal assistant sa Philippine National Construction Corporation at bilang legal associate sa law firm ng Puruganan, Ongkiko & Chato.
Ayon sa CTA website, si Ringpis-Liban ay nagtapos ng Bachelor of Arts in Economics mula University of Santo Tomas at law degree mula sa University of the Philippines College of Law.
Nakahawak din siya ng ilang posisyon sa Philippine Judges Association, kabilang na ang senior vice president, secretary general, vice president for external affairs, at regional director for Region III. Sa Philippine Women Judges Association, nagsilbi siya bilang secretary at auditor.
Naging kinatawan din si Ringpis-Liban ng Pilipinas bilang liaison officer sa International Association of Women Judges. Kris Jose
