MANILA, Philippines – Aksidente ang pagsabog sa Zamboanga City na ikinasugat ng dalawang miyembro ng Philippine Coast Guard (PCG) nitong Sabado, ayon sa ahensya nitong Linggo, Oktubre 25.
Sa isang pahayag, sinabi ng PCG na nangyari ang insidente alas-10:39 ng gabi noong Oktubre 24 sa barracks ng Explosive Ordnance Disposal Unit – Southwestern Mindanao (EODU-SWM) sa loob ng Port Police Compound, Zamboanga City International Pier sa kahabaan ng Corcuera Street sa Port Area ng lungsod.
”The personnel were preparing for the upcoming Explosive Ordnance Reconnaissance Agent (EORA) Training when an accidental detonation of explosive lecture material-low explosive occurred,” anang Coast Guard.
Isinugod sa Ciudad Medical Hospital ang dalawang miyembro ng PCG. Pareho silang may malay nang dumating at patuloy na ginagamot.
Tiniyak ng Coast Guard sa publiko na ang insidente ay hindi nauugnay sa anumang terrorist activity.
”It has been classified as an accidental detonation during the handling and preparation of explosive materials within PCG premises,” ayon sa PCG.
Iniimbestigahan na ng PCG ang insidente. Jocelyn Tabangcura-Domenden
