MANILA, Philippines – Ibinasura ng Korte Suprema (SC) nitong Huwebes, Hulyo 9, ang mga petisyong kumukuwestiyon sa legalidad ng No Contact Apprehension Policy (NCAP)sa Metro Manila.
Sa desisyong isinulat ni Associate Justice Rodil Zalameda, sinabi ng SC na “naging moot na ang mga isyung binanggit dahil sa pagpapatupad ng bago at iisang framework sa pagpapatupad ng trapiko sa ilalim ng Metro Manila Traffic Code of 2023 (MMTC 2023).”
Dagdag pa ng Korte Suprema, bukod sa pagiging moot, ibinasura rin ang mga petisyon dahil sa kawalan ng standing, paglabag sa exhaustion of administrative remedies at hierarchy of courts, at forum-shopping.
Sa ilalim ng NCAP, ipinapatupad ng Metropolitan Manila Development Authority (MMDA) at ng mga local government unit (LGU) ang mga batas trapiko gamit ang teknolohiya sa pamamahala ng trapiko.
Kabilang dito ang mga advanced na camera system na pinapatakbo ng computer vision artificial intelligence kung saan pinapayagan ng NCAP ang MMDA at mga LGU na mahuli ang mga lumalabag sa trapiko kahit hindi pisikal na naroroon ang enforcer.
Ibinasura ng SC ang pinagsamang petisyon ng Kilusan sa Pagbabago ng Industriya ng Transportasyon at iba pang petitioners na humiling na ideklarang labag sa Saligang Batas ang mga ordinansa ng Maynila, Muntinlupa, Parañaque, Quezon City, at Valenzuela na nagpapatupad ng NCAP ng MMDA.
Bukod sa pagpapatupad ng mga batas trapiko, layunin din ng NCAP na pagaanin ang trapiko at bawasan ang korapsyon sa pamamagitan ng paggamit ng digital cameras sa halip na tradisyunal na traffic enforcers.
Ayon naman sa mga petitioner, walang basehan ang NCAP sa Republic Act No. 7924 o MMDA Law, at sa Republic Act 4136 o Land Transportation and Traffic Code.
Iginiit din nila na nilalabag ng NCAP ang due process dahil agad na naha-huli ang mga lumalabag sa trapiko nang hindi sila nabibigyan ng pagkakataong magpaliwanag.
Ang SC ay nagsagawa pa ng oral arguments para pakinggan ang mga petisyon. Jocelyn Tabangcura-Domenden
