MANILA, Philippines – Bumilis ang inflation noong Pebrero at umabot sa pinakamataas na antas sa loob ng 13 buwan, na pangunahing dulot ng mas mataas na presyo ng pagkain at non-alcoholic beverages, pati na ng housing at utilities, ayon sa datos na inilabas ng Philippine Statistics Authority (PSA) nitong Huwebes.
Tumaas sa 2.4% ang inflation noong Pebrero, mas mabilis kaysa 2.0% noong Enero at 2.1% noong Pebrero 2025. Ito ang pinakamabilis na antas mula nang pumalo sa 2.9% ang inflation noong Enero 2025.
“The uptrend in the overall inflation in February 2026 was primarily influenced by the faster annual increment in the index of the heavily weighted food and non-alcoholic beverages at 1.8%,” ayon sa PSA. Sinabi rin ng PSA na may 29.5% share sa kabuuang inflation rate ang naturang grupo.
Ang core inflation, na hindi kasama ang piling food at energy items, ay nasa 2.9% noong Pebrero, mas mataas sa 2.8% noong Enero at 2.4% noong Pebrero 2025.
Ayon sa PSA, nagtulak din pataas sa presyo ang housing at utilities, na may inflation na 3.5% noong Pebrero mula 3.3% noong kaparehong buwan noong nakaraang taon. Mas mabilis ding tumaas ang inflation sa restaurants and accommodation services (4.4%), recreation, sport, and culture (4.3%), health (3.2%), furnishings and household equipment (2.9%), personal care and miscellaneous goods and services (2.8%), at clothing and footwear (2.4%). Tinatayang 29.9% ang ambag ng housing at utilities sa overall inflation, habang 17.8% naman ang restaurants and accommodation services.
Umangat ang food inflation sa 1.6% mula 0.7% noong Enero ngunit mas mababa sa 2.6% noong Pebrero 2025, at may 24.2% kontribusyon sa overall inflation. Tumaas ng 3.4% ang presyo ng bigas, habang mas mabilis din ang year-on-year increases sa corn, flour, fish and other seafood, milk and other dairy products, fruits and nuts, at vegetables. Mas mababa naman ang annual increases sa oils and fat, at ready-made food and other food products not elsewhere classified.
Samantala, mas lumalim ang pagbaba ng transport index na may annual decline na 0.3% noong Pebrero mula 0.2% noong Enero, ngunit sinabi ni National Statistician Claire Dennis Mapa na posibleng maging positibo ang transport inflation sa Marso dahil sa mga kaganapan sa Middle East.
“Yung expectation natin (Our expectation) is this will be in the positive territory,” ani Mapa, habang nananatiling volatile ang global oil markets dahil sa sigalot sa pagitan ng Estados Unidos at Iran.
Sinabi ng Department of Energy (DOE) na maaaring tumaas pa ang presyo ng petrolyo dahil sa mga global developments gaya ng pagsasara ng Strait of Hormuz. Nauna nang itinaas ang pump prices ng P1.90 kada litro sa gasolina, P1.20 kada litro sa diesel, at P1.50 kada litro sa kerosene noong Martes, Marso 3, 2026.
“Nakita natin ‘pag tumataas ‘yung presyo ng diesel, gasoline, ‘yun ‘yung una, and then susunod ‘yung price of transport,” ani Mapa.
Batay rin sa ulat, napatay sa US-Israeli airstrikes noong weekend ang Iranian Supreme Leader Ayatollah Ali Khamenei, na kinumpirma rin kalaunan ng Iranian state media. Dagdag pa rito, sinabi ni US President Donald Trump na magpapatuloy ang combat operations sa Iran hanggang makamit ang mga layunin, at kinumpirma niyang tatlong US service members ang nasawi at posibleng madagdagan pa ang casualties. Santi Celario
