MANILA, Philippines – Sinabi ng Philippine Ambassador to the U.S. Jose Manuel Romualdez nitong Martes na hindi isinara ng Pilipinas ang posibilidad na makabili ng 20 Lockheed Martin F-16 fighter jets mula sa Estados Unidos.
Ayon kay Romualdez sa isang US-Philippines Society press conference, “We’re not closing the door, but it’ll take quite some really imaginative and creative ways to be able to purchase.” Idinagdag niya na ang posibleng pagbili ay “is not within budget,” ngunit nagpapatuloy ang usapan sa pagitan ng Pilipinas at Lockheed Martin.
Dati nang nagsumite ang gobyerno ng liham ng intensyon para sa 16 F-16C Block 70/72 at apat na F-16D Block 70/72. Noong Abril, inaprubahan ng U.S. Department of State ang potensyal na foreign military sale ng 20 F-16 jets sa halagang humigit-kumulang USD5.58 bilyon.
Noong Setyembre, inihayag ni Romualdez na ipinagpaliban muna ng Pilipinas ang plano dahil sa kakulangan sa pondo. Bagama’t makakatanggap ang Pilipinas ng hindi bababa sa USD2.5 bilyon sa defense capabilities mula 2026–2030, inaasahan umano na ito’y ilalaan “mostly for defense capabilities on the ground, maritime security, and cyber security.”
“So, we just have to wait and see on how we can move forward on that particular item,” dagdag pa niya. RNT/MND
