MANILA, Philippines – Sinabi ng Philippine Atmospheric, Geophysical and Astronomical Services Administration (PAGASA) nitong Martes, Setyembre 9, na inaasahang mananatili “cyclone-free” ang bansa hanggang sa katapusan ng linggo, ngunit maaari pa ring makaranas ng localized thunderstorms sa ilang bahagi ng bansa.
Sinabi ni PAGASA weather specialist Obet Badrina na sa kasalukuyan ay walang low-pressure area (LPA) na binabantayan simula nitong Martes.
“Posible po hanggang sa weekend medyo maliit na ‘yung tyansang magkaroon tayo ng bagyo sa loob ng Philippine Area of Responsibility base sa pinakahuling datos natin ngayon,” aniya.
Sa Miyerkules, Setyembre 10, ang mainit na hangin mula sa Karagatang Pasipiko, na kilala bilang easterlies, ay maaaring patuloy na magdala ng kalat-kalat na pag-ulan sa rehiyon ng Bicol.
Ang nalalabing bahagi ng bansa ay maaaring makaranas ng isolated rain showers at thunderstorms, partikular na sa hapon at gabi.
Mula Huwebes hanggang Sabado, Setyembre 11 hanggang 13, sa pangkalahatan ay inaasahan ang magandang panahon sa buong bansa.
Gayunpaman, ang mga localized thunderstorm ay maaari pa ring mangyari sa hapon o gabi.
Pinayuhan ng PAGASA ang publiko na manatiling mapagbantay laban sa posibleng pagbaha at pagguho ng lupa, lalo na sa panahon ng katamtaman hanggang sa malakas na pag-ulan o matinding pagkidlat.
Ang mga weather system na ito ay karaniwang tumatagal ng hanggang tatlong oras at maaaring magdulot ng matinding ulan, kidlat, malakas na hangin. RNT/MND
