MANILA, Philippines – Inamin ni House Committee on Public Accounts Chairman at Bicol Saro Party-list Rep. Terry Ridon na may matibay na plunder case na maisasampa ang Kamara laban sa mga opisyal ng DPWH 1st District Engineering Office at Syms Construction Trading na sangkot sa ghost flood project sa Bulacan.
“We have copies of all relevant documents to build the cases against officials of the DPWH 1st District Engineering Office and the private contractor, Syms Construction Trading, all of whom are involved in the P55 million Baliwag ghost project,” paliwanag ni Ridon.
“The threshold for plunder is P50 million. This project is P55 million. Plunder charges should be filed against all involved personalities in the soonest time,” dagdag pa niya.
Sinabi ni Ridon na unang palalakasin ng Kamara ang kaso sa P55 million flood control project sa Baliwag, Bulacan na napatunayang ghost project, at susunod namang iimbestigahan ang iba pang proyekto.
Ilan sa tinukoy na opisyal ng DPWH na sangkot sa naturang proyekto ay sina Bulacan Regional Director Henry Alcantara, Bulacan District Engineer Brice Hernandez, at Assistant Engineer Jaypee Mendoza.
Ayon kay Ridon, ang pag-amin ni Alcantara na may pinirmahan siyang P55 milyon kontrata para sa ghost project sa Baliwag, Bulacan ay simula pa lamang ng pagbubunyag ng mas malalim na anomalya sa DPWH Bulacan.
Dagdag ni Ridon, hindi lamang si Alcantara ang kakasuhan ng Kamara kundi pati ang dalawa pang mataas na opisyal ng DPWH Bulacan na sina District Engineer Brice Hernandez at Assistant District Engineer Jaypee Mendoza, na kapwa aniya ay may kaparehong marangyang pamumuhay tulad ni Alcantara.
“He is not only a big fish. He is a whale. Ang dami po talagang mga bagay po na pinakialaman niya, and siyempre, may showing po talaga na ‘yung kanyang lifestyle is really different from ordinary engineers of the DPWH,” ani Ridon.
Samantala, nagpalabas na ng subpoena ang Kamara sa limang contractor na hindi nakadalo sa unang joint panel hearing na isinasagawa ng Committees on Public Accounts, Public Works and Highways, at Good Government and Public Accountability.
Ang limang contractor ay kabilang sa 15 kumpanyang tinukoy ni Pangulong Ferdinand Marcos Jr. na nakakuha ng P500 billion halaga ng flood control projects ng gobyerno.
Kabilang sa sinumpoena ng Kamara ay ang Royal Crown Monarch Construction and Supplies Corporation, Syms Construction Trading, Alpha and Omega General Contractor and Development Corporation, St. Timothy Construction Corporation, at Wawao Builders Corporation. Gail Mendoza
