VATICAN CITY — Patuloy na bumubuti ang kalagayan ni Pope Francis, ayon sa anunsyo ng Vatican nitong Miyerkules, Pebrero 26. Ayon sa pinakabagong ulat, wala na siyang problema sa bato, na nagbigay ng ginhawa sa mga nangangambang tagasunod.
Sa kanyang ika-13 gabi sa Gemelli Hospital sa Roma, ito na ang pinakamahabang panahon ng pananatili sa ospital ng 88-anyos na Santo Papa mula nang magsimula ang kanyang halos 12-taong pamumuno. Sa kabila nito, iniulat ng Vatican na may bahagyang pagbuti sa kanyang kondisyon sa nakalipas na 24 oras.
Ayon sa Vatican, patuloy na sumasailalim si Pope Francis sa oxygen support ngunit hindi na siya nagkaroon ng panibagong krisis sa paghinga. Lumabas din sa CT scan noong Martes na normal na ang pag-usad ng kanyang paggaling mula sa double pneumonia.
Noong weekend, nagdulot ng pangamba ang ulat na may bahagyang kakulangan sa paggana ng kanyang mga bato, na maaaring humantong sa kidney failure. Ngunit nitong Miyerkules, kinumpirma ng Vatican na nalutas na ang isyung ito.
Bagamat seryoso pa rin ang kanyang kalagayan, nananatili siyang alerto, nakakakain nang maayos, at nakakagalaw sa loob ng kanyang silid sa ospital, ayon sa isang opisyal ng Vatican. Gayunpaman, nananatiling “maingat” ang kanilang pananaw sa kanyang kabuuang paggaling.
Samantala, patuloy ang pagdaloy ng suporta at panalangin mula sa iba’t ibang panig ng mundo. Sa Roma, nagtipon ang komunidad ng Argentina sa Our Lady of Sorrows Church upang ipanalangin ang kanyang kalusugan. Ayon kay Reverend Mario Aler, mahalaga ang papel ni Pope Francis sa nalalapit na 2025 Catholic Holy Year.
Sa St. Peter’s Square naman, daan-daang deboto at mga lider ng Simbahan ang muling nagsagawa ng prayer vigil. Magpapatuloy ang seremonyang ito sa buong linggo bilang simbolo ng pag-asa para sa kanyang ganap na paggaling.
Sa kabila ng kanyang kalagayan, patuloy ang operasyon ng Vatican, at inanunsyo nito ang ilang bagong appointments na kinakailangan ng kanyang pag-apruba.
Si Pope Francis, na nagmula sa Argentina, ay nanungkulan bilang pinuno ng Simbahang Katolika mula pa noong 2013 at nananatiling isang mahalagang lider sa relihiyon at pandaigdigang pulitika. RNT
