MANILA, Philippines – Isasagawa ang pilot test ng Commission on Elections (Comelec) ‘Register Anytime, Anywhere’ program nito sa National Capital Region (NCR) kapag natuloy ang voter registration sa susunod na buwan.
Ayon kay Comelec Chairman George Garcia, asahan ang pagsasagawa ng voter registration sa piling ospital, call centers, transport terminals, airports, at iba pang pampublikong lugar. Mayroon din aniyang registration kahit sa gabi.
Aniya, kapag mayroon nang mas mahabang panahon ng voter registration, maaari nang gamitin ang programang ito sa buong bansa.
Kahit na ang nationwide voter registration period ay mula Agosto 1 hanggang 10, ang pilot test sa NCR ay isasagawa lamang hanggang Agosto 7.
Ang 10-araw na nationwide voter registration sa susunod na buwan ay inaprubahan ng Comelec en banc. Kaugnay ito sa Barangay at Sangguniang Kabataan Elections na itinakda sa Disyembre 1. (Jocelyn Tabangcura-Domenden)
