MANILA, Philippines- Sinabi ni dating Negros Oriental Governor Pryde Henry Teves nitong Biyernes na hindi siya magtatago matapos maaresto dahil sa umano’y terror financing at kalaunan ay pinalaya matapos makapagpiyansa.
Sumuko si Teves sa mga awtoridad sa Dumaguete City matapos mapag-alamang hinahanap siya ng mga pulis upang silbihan ng warrant of arrest.
“I will face it squarely. It is my duty as a Filipino and as a Christian,” ani Teves.
“Don’t expect me to shun away, to run, to escape, to hide,” dagdag niya.
Nagpiyansa si Teves ng P600,000 para sa 3 counts ng paglabag sa Terrorism Financing Prevention and Suppression Act.
Kapatid siya ng pinatalsik na si dating Negros Oriental Representative Arnolfo Teves Jr., pinaniniwalaang mastermind sa pagpatay kay Governor Roel Degamo.
Idineklara ng Anti-Terrorism Council ang magkapatid bilang mga terorista dahil sa pagkakasangkot nila sa murder cases sa lalawigan.
“If I am most wanted, I would have been hiding a long time ago,” pahayag ng dating gobernador, na iginiit na handa siyang makipagtulungan sa mga awtoridad sa imbestigasyon.
Sa isang social media post, inihayag ng biyuda ni Degamo na si Pamplona Mayor Janice Degamo na hindi siya titigil “until every member of the Teves Terrorist Group faces justice for what they did to Roel and our province.” RNT/SA
