MANILA, Philippines – Arestado ng Bureau of Immigration (BI) ang isang South Korean national na pinaghahanap ng mga awtoridad sa kanilang bansa dahil sa umano’y pagkakasangkot sa ilegal na pagsusugal sa pamamagitan ng mga hindi awtorisadong online game server na pinatatakbo sa Pilipinas.
Kinilala ni BI Fugitive Search Unit (FSU) Chief Rendel Ryan Sy ang suspek na si Lee Seunghyun, 41, na nadakip noong Oktubre 13 sa Barangay Western Bicutan, Taguig City.
Ayon kay Sy, isinagawa ang operasyon kasunod ng kahilingan ng pamahalaan ng South Korea na ipatapon si Lee upang harapin ang mga kasong kinakaharap nito sa sariling bansa. Iniulat din na mayroon siyang Interpol Red Notice.
Batay sa impormasyong ibinigay ng South Korean Embassy, naglabas ng arrest warrant ang Busan District Court laban kay Lee noong Enero 15, 2026, matapos siyang kasuhan ng paglabag sa Game Industry Promotion Act ng South Korea.
Ayon sa mga awtoridad ng South Korea, mula Enero 2019 ay umano’y nakipagsabwatan si Lee sa kanyang mga kasamahan upang magpatakbo ng tatlong hindi awtorisadong pribadong online game server sa Angeles City, Pampanga.
Ginamit umano ng grupo ang isang minanipulang interface adapter upang mapatakbo ang mga server at makalikha ng ilegal na kita sa pamamagitan ng pagbebenta ng virtual currency na tinatawag na “Adena” kapalit ng totoong pera.
Sa ganitong paraan, umano’y nakapagsagawa ang grupo ng mga transaksiyong pinansyal na hindi pinahihintulutan sa pamamagitan ng kanilang mga online game server.
Batay naman sa rekord ng BI, huling pumasok sa Pilipinas si Lee noong Hulyo 26, 2018 at mula noon ay hindi na umalis ng bansa, dahilan upang maituring siyang overstaying alien.
Nasa blacklist na rin siya ng BI mula Agosto 2019 dahil sa pagiging pugante sa hustisya.
Kasalukuyang nakapiit si Lee sa pasilidad ng BI sa Taguig City habang hinihintay ang pinal na resulta ng deportation proceedings laban sa kanya.
Binigyang-diin ni BI Commissioner Joel Anthony M. Viado na patuloy na hahabulin ng ahensiya ang mga dayuhang pugante upang hindi magamit ang Pilipinas bilang taguan ng mga taong umiiwas sa batas.
Ayon kay Viado, hindi dapat maging ligtas na kanlungan ng mga dayuhang pinaghahanap ng kanilang sariling pamahalaan ang bansa, at patuloy na makikipagtulungan ang BI sa mga international partner upang matiyak na haharap ang mga ito sa kaukulang proseso ng batas. Jay Reyes
