MANILA, Philippines – Patay ang miyembro ng New People’s Army (NPA) matapos makasagupa ang mga sundalo sa Barangay Gusaran, Silvino Lubos, Northern Samar.
Sinabi ng Philippine Army (PA) na ang 30 minutong sagupaan ay naganap sa pagitan ng mga tropa ng 19th Infantry Battalion at mga rebelde bandang 6:57 ng umaga ng Miyerkules, Disyembre 10 kasunod ng tip mula sa isang concerned citizen kaugnay sa extortion at iba pang illegal na aktibidad ng grupo.
Narekober sa lugar ang isang M16 rifle, dalawang magazines, backpacks, bandolier, personal items, at iba’t ibang dokumento na pinaniniwalaang subersibo.
Inilarawan ng 8th Infantry Division (ID) ng PA ang engkwentro bilang “crushing blow” sa iba pang remnant ng sub-regional committee Emporium ng NPA Eastern Visayas Regional Party Committee.
“The operation was launched following persistent reports about armed individuals in the area who were conducting extortion activities and coercing farmers to surrender portions of their harvested crops. These threats disrupted local livelihoods and created fear among communities dependent on subsistence farming,” saad sa pahayag ng 8th ID.
Pinuri naman ni Brig. Gen. Carmelito Pangatungan, commander ng PA 803rd Brigade, ang civilian informant at operating troops sa pagpapanatili ng kapayapaan at pagprotekta sa mga komunidad sa Northern Samar.
“This operation clearly shows that civilians no longer tolerate the hardships inflicted by the communist terrorist group,” saad sa hiwalay na pahayag ni Pangatungan.
Hinimok niya ang mga residente na patuloy na makipagtulungan sa mga awtoridad para wakasan na ang insurhensiya.
Umapela rin siya sa mga natitirang miyembro ng NPA na sumuko na at tanggapin ang tulong ng pamahalaan sa kanilang pagbangon. RNT/JGC
