Resto ni Matteo, nasunog!

Manila, Philippines- Pansamantalang nabalam ang operasyon ng restaurant na pag-aari ni Matteo Guidicelli dahil sa sunog.

Ito’y ang Da Gianni Cucina Italiana na matatagpuan sa two-storey building ng West Gate Hub sa Barangay Alabang, Muntinlupa City.

Ayon sa inisyal na ulat ng Bureau of Fire Protection ng nasabing syudad, alas 12:10 ng tanghali nang maireport sa kanilang insidente.

Nadilaan kasi ng apoy ang exhaust duct pipe ng resto, dahilan para kumalat sa ilang bahagi nito.

Open flame na lutuan ang pinagmulan ng sunog.

Bandang alas dose beinte ng tanghali nang maapula ang sunog.

Wala namang naiulat na nasaktan, bagama’t may kalakihan umano ang naging pinsala sa Class A na Italian restaurant.

Ipinagpapasalamat naman ito ng management at tinitiyak na lahat ng safety protocols ay in place para sa kanilang mga parokyano.

Ayon sa Operation Procedures Manual ng BFP ay medyo malaking halaga ang naging pinsala ng sunog.

November 22 nang maganap ito pero kinabukasan din ng alas sais ng gabi ay muling binuksan sa customer ang resto ng aktor at asawa ni Sarah Geronimo.

Sa nasabing gusali rin ang G Studios ng Popstar Royalty. Ronnie Carrasco III