MANILA, Philippines – Inaasahang muling bababa ang presyo ng mga produktong petrolyo sa Hunyo 30 dahil sa pagluwag ng pangamba sa pandaigdigang suplay ng langis na nagpababa sa presyo ng world crude oil.
Batay sa pagtataya ng isang industry source, maaaring bumaba ang presyo ng diesel ng 70 sentimos hanggang P1.20 kada litro, habang posibleng magbawas ng 50 sentimos hanggang P1.50 kada litro ang gasolina.
“World crude oil prices have eased down, despite the tempered optimism over the US-Iran interim peace deal and ongoing negotiations, on improving broader supply outlook as physical flows through the Strait of Hormuz gradually recovers, and the return of disrupted Middle Eastern barrels as Gulf producers ramp up production,” ayon sa industry source.
“Also weighing on prices is the sanctions waiver on Iranian oil that will allow Iran-origin crude oil and other petroleum products into the market,” dagdag nito.
Batay ang pagtataya sa unang apat na araw ng kalakalan sa Mean of Platts Singapore at galaw ng foreign exchange. Posible pa itong magbago depende sa resulta ng huling trading session ngayong linggo. Dave Baluyot
