MANILA, Philippines – Sa botong 269 at 34 abstain, hinirang si Leyte Rep Martin Romualdez na syang nahalal na House Speaker ng 20th Congress.
Si Romualdez ang siyang natatanging nominado para sa pwesto.
Si Quezon Rep David Suarez ang nagmosyon para inominate si Romualdez, ang mosyon ay sinegundahan naman nina Ilocos Norte Rep. Sandro Marcos, TUCP Partylist Rep Raymond Mendoza, Antipolo Rep Ronaldo Puno, Misamis Oriental Rep Yevgeny Emano at Quezon Rep Wilfredo Enverga.
Bago pa man magbukas ang 20th Congress ay kumpiyansa nang mahihirang si Romualdez sa ikalawang termino bilang House Speaker matapos makuha ang suporta ng supermajority.
Si Romualdez ang pangulo ng Lakas Christian Muslim Democrats. Bago ito nagsilbi bilang House Speaker ay naging Majority Leader ng 18th Congress.
Matapos ang kanyang oathtaking at sa kanyang acceptance speech ay nagpaabot ng pasasalamat si Romualdez sa suportang nakuha niya, aniya, tinatanggap nya ang panibagong hamon.
“Ang tiwala ay hindi gantimpala, kundi panibagong hamon. At bawat hamon ay pagkakataon para maglingkod nang mas tapat, mas totoo, at mas buo,” pahayag nito.
Hindi naman naiwasan ni Romualdez na magkomento ukol sa naging desisyon ng Supreme Court sa impeachment ni Vice President Sara Duterte.
“Let me say this with the utmost respect: The Supreme Court has spoken, and we recognize its decision. But let it never be said that the House of the People bowed in silence,” pahayag ni Romualdez.
Inulit nito na ang Kongreso ang may fundamental role sa isyu ng accountability at iginiit nito ang “constitutional boundary” sa pagitan ng mga sangay ng gobyerno.
“At the same time, we draw a line: the power to initiate impeachment is the exclusive domain of this Chamber. It flows from the people’s will and rests solely on the clear language of the Constitution. It is neither granted nor guided by any outside institution. The Court may close a case, but it cannot close a cause. The pursuit of accountability is not a moment — it is a mandate,” paliwanag nito.
Idinagdag pa nito na ang aksyon ng Kamara ay hindi itinutulak ng pulitika bagkus ay prinsipyo.
“We are not moved by personalities, but by principles. We are not driven by vendetta, but by vigilance. Our goal has never been to destroy — only to demand the truth. When institutions falter, the House of the People always stands firm. When others fear the storm, your House holds the line. And as your Speaker, I will be here — not just to preside, but to protect,” dagdag pa nito.
Nangako si Romualdez na ang kanyang liderato sa Kamara ay parang isang ama na nagpoprotekta at nagbabantay.
“Hindi ko kayo iiwan sa gitna ng unos. Gaya ng ama ng tahanan na hindi natutulog kapag may bagyong papasok, babantayan ko ang ating Kapulungan. Sisiguraduhin kong walang bubong ang babagsak, walang pader ang magigiba, at walang miyembro ang mapapabayaan.
Kahit anong bagyo at baha, hindi tayo susuko. Titindig tayo at hindi panghihinaan ng loob. Kasama ninyo ako sa pagsalubong ng bagong araw,” pagtatapos pa ni Romualdez.
Samantala, nagbigay din si Romualdez ng kanyang pasasalamat kay Pangulong Bongbong Marcos sa patuloy na tiwala at kumpiyansa sa kanyang liderato. Gail Mendoza
