MANILA, Philippines — Sinabi ni House Deputy Speaker at Iloilo 1st District Rep. Janette Garin na ang mga senator-judges sa impeachment trial ni Vice President Sara Duterte ang dapat manatiling walang kinikilingan.
Ayon kay Garin, tungkulin ng mga senador na pakinggan, suriin, pag-aralan, at pagdebatehan ang lahat ng ebidensya bago magpasya.
“Ang neutral ay ang senator-judges kasi kailangan nilang pakinggan, i-analyze, pag-aralan, pag-debatihan and lahat ng related sa kaso para mag-desisyon.”
“Hindi pwedeng maging bias ang senator-judges.”
Nagbigay siya ng pahayag matapos sabihin ni Sen. Robin Padilla sa mga prosecutor na “not be one-sided” sa pagdinig noong Miyerkules.
Samantala, umaasa si lead prosecutor Rep. Gerville “Jinky Bitrics” Luistro na mananaig ang pagiging patas ng mga senator-judges.
“At the end of the day, I am hopeful na political neutrality ang mananaig. Sapagkat napakaliwanag ‘yan sa Senate rules on Impeachment and they were the ones who drafted and approved the Senate rules.”
Sinabi naman ni private prosecutor Lorna Kapunan na hindi lamang si Duterte ang hinuhusgahan sa impeachment trial kundi maging ang mga senator-judges.
“The one being judged here is not only the Vice President, the judges also are being judged by the public.”
Hinikayat din niya ang publiko na suriin ang mga ebidensya, mga tanong, mga sagot, at mga dokumentong iniharap sa impeachment court upang matukoy ang katotohanan. RNT/MDS
