MANILA, Philippines – Kinuwestiyon ni Pasig congressional candidate Christian “Ian” Sia ang desisyon ng Commission on Elections (Comelec) na i-disqualify siya dahil sa umano’y diskriminatoryong pahayag laban sa kababaihan, na labag sa Safe Spaces Act.
Sa kanyang pahayag, sinabi ni Sia na hindi siya nabigyan ng kopya ng petisyon kaya’t hindi siya nabigyan ng karampatang due process.
“Nabasa ko po ‘yung decision, ginamit pong dahilan ‘yung diumano’y violation ng Safe Spaces Act para i-disqualify po ako. Una po, hindi ko po natanggap ‘yung kopya ng petition na dinesisyunan, therefore I was not given procedural due process,” ani Sia.
Ikinumpara rin niya ang kanyang kaso kina Pastor Apollo Quiboloy at Senador Bato dela Rosa.
Ayon sa Comelec Second Division, kahit manalo si Sia, hindi siya agad ipoproklama hangga’t hindi pa tapos ang resolusyon ng kanyang disqualification case.
Giit ni Sia, “mali po ang desisyon” at pinanindigang may pagdududa rin umano ang Comelec sa sarili nitong ruling, base sa isinamang kondisyon sa kanilang desisyon.
“Mali po ang desisyon and COMELEC knows it kaya may colatilla ang desisyon nila na if I win they will suspend the proclamation until the disqualification case is finally resolved,” giit pa niya. RNT
