Skills program sa pagpapadali ng pagkuha ng trabaho, pinalakas ng DOLE at TESDA

MANILA, Philippines – Pinagtugma ng Department of Labor and Employment (DOLE) at Technical Education and SKills Development Authority (TESDA) ang kanilang mga pangunahing programa upang madaling makakuha ng trabaho o magsimula ng kanilang sariling negosyo ang mga nagtatapos ng technical vocational trainings.

Higit na pinalakas ng dalawang ahensya ang kanilang partnership sa pamamagitan ng paglagda sa Supplemental Joint Memorandum Circular (JMC) nitong Miyerkules, Hunyo 24, sa TESDA Board Room sa Taguig City.

Pinangunahan nina DOLE Secretary Francis Tolentino at TESDA Secretary Kiko Benitez ang paglagda sa kasunduan na nagbigay-pansin sa pangakong magtutulungan sa employment facilitation, livelihood support at mga programa sa technical vocational education and training (TVET).

Binigyang-diin ni Benitez ang pagpapalakas sa partnership ng DOLE at TESDA na nakadisenyo upang tiyakin na ang mga ginagawa ng pamahalaan ay tunay na magbibigay ng oportunidad sa mga Pilipino.

“This strengthened effort alongside DOLE builds the seamless pathways we aim for Training to Trabaho. We want to make sure that Filipino learners and workers are not left on their own after training. Dapat bigyan natin sila ng gabay at daan papuntang trabaho,” ayon sa TESDA chief.

“Tech-voc offers the shortest runway to employment. Kaya naman sa TESDA, kayang kaya ang trabaho agad,” dagdag pa niya.

Gayundin, ito ang unang opisyal na pagbisita ni Secretary Tolentino na siya ring TESDA Board Chair, sa TESDA simula nang siya ay maitalaga bilang DOLE Secretary, na nagpatibay pa sa ugnayan ng dalawang ahensya sa ilalim ng kanyang dalawang papel na ginagampanan.

Ang paglagda sa Supplemental JMC ay hudyat sa higit na pinalakas na ugnayan at pagtutulungan ng dalawang ahensya na nagsimula sa Joint Memorandum CIrcular No. 001, series of 2024, na siya namang naglatag ng framework para sa employment facilitation, livelihood support at TVET programs.

Ang bagong lagda na Supplemental JMC ay mas magpapatibay sa partnership at magpapakilala sa mas malinaw na sistema at mekanismo para sa episyente, maayos at nakatutok na serbisyo sa manggagawang Pilipino at mga komunidad.

Pangunahing tampok sa kasunduan ang pagbalangkas ng ‘referral pathway’ o ‘graduation system’ na aakay sa mga benepisyaryo sa ibat-ibang programa ng pamahalaan. Ito ang sistema para tiyaking magtatagal ang kanilang trabaho o negosyong pasisimulan.

Kabilang dito ang transition ng isang benepisyaryo ng TUPAD sa mga scholarship program at job placement ng TESDA o ang pagtuloy ng isang TESDA STEP graduate sa DOLE’s Integrated Livelihood Program (DILP).

Pinalalakas rin ng kasunduan ang accountability sa pamamagitan ng Anti-Double Dipping Policy, na naglalagay ng malinaw na proseso ng beripikasyon upang tiyakin na hindi madoble ang matanggap na tulong mula sa dalawang ahensya at higit na marami ang mabiyayaan sa ibinibigay na tulong ng pamahalaan.

Upang higit pang suportahan ang inklusibong enterprise development, ipinapakilala ring ng Supplemental JMC ang Community-Based Enterprise Groups na tatawaging “Tropa sa Negosyo at Trabaho” na bubuo sa lima o higit pang indibidwal na may komplementaryong kasanayan (complementary skills) para magtayo ng mga enterprises at palakasin ang kanilang productivity, sustainability at market access.

Bukod rito, ipapatupad rin ng DOLE at TESDA ang Data Sharing Framework sa pamamagitan ng pagsasalo sa digital registry upang mas madaling matukoy ang mga benepisyaryo, tiyakin ang kanilang eligibility at pag-isahin ang pagmomonitor at paggawa ng report. Ito ay magmumula sa kasalukuyang data sharing agreement ng dalawang ahensya.

Ang mas pinalakas na DOLE-TESDA partnership ay nagbibigay-diin sa pagbuo ng pinagsanib, episyente at tumutugon na labor at skills ecosystem, alinsunod sa mithiin ni Pangulong Ferdinand “Bongbong” Marcos na patatagin ang manggagawang Pilipino, palawakin ang access sa oportunidad ng dekalidad na trabaho at palakasin ang inklusibo at mas nagtatagal na pag-unlad ng ekonomiya. RNT