MANILA, Philippines – Nanawagan si Solid North Party-list Rep. Ching Bernos sa Commission on Higher Education (CHED) na pag-isipang mabuti ang panukalang alisin ang ilang subjects sa kolehiyo na nagtuturo ng critical thinking.
Ang pahayag ay ginawa ni Bernos kasabay ng public hearing ng CHED ukol sa pagbabago sa General Education (GE) curriculum, kung saan balak bawasan ang mandatory units mula 36 patungong 18 units na lamang simula Academic Year 2027–2028.
“I hope the CHED will reconsider their proposal, especially with the public clamor, especially from educators themselves, not to erase subjects like literature, art, Philippine history, and ethics, among others,” ani Bernos.
Binigyang-diin ng mambabatas na hindi dapat ituring na parang production line lamang ang mga estudyante. Ayon sa kanya, ang layunin ng higher education ay hubugin ang mga susunod na pinuno ng bansa.
Sa ilalim ng panukala ng CHED, ang mga subjects gaya ng Philosophy, Ethics, Literature, at History ay pagsasamahin na lamang sa limang mas malawak na “skills-based courses,” kabilang dito ang Professional Communication, Global Trends and Emerging Technologies, Data Evidence and Ethics in a Knowledge Society, Rizal and Philippine Studies, at Labor Education.
Ayon kay Bernos, sa gitna ng mabilis na pag-unlad ng Artificial Intelligence (AI) at teknolohiya, mas lalong kailangan ng mga estudyante ang matibay na pundasyon sa critical thinking.
“Hindi natin mauunahan ang AI at teknolohiya. These will always be faster and more efficient than us. However, we can give our students an advantage if we stick to providing them with an education that provides a blueprint for how to properly think and act in the face of an ever-changing world and environment,” giit ni Bernos.
Sinabi ni Bernos na ang mga GE subjects ay mahalaga upang maging well-rounded at may malasakit na indibidwal ang mga kabataang Pilipino. Gail Mendoza
