MAGUINDANAO DEL SUR — Arestado ang isang dating bomber ng Bangsamoro Islamic Freedom Fighters (BIFF) na umano’y sangkot sa pag-ambush sa mga pulis sa Shariff Aguak noong Marso 28 at sa Mamasapano massacre noong 2015.
Dinakip ang suspek sa Barangay Tukanalipao, Mamasapano noong Martes, Hulyo 21, ayon sa Maguindanao del Sur Police Provincial Office (MDSPPO).
Kinilala siya bilang senior adviser ng Penenekelan criminal gang at umano’y may kaugnayan sa Dawlah Islamiyah-Hassan Group. Sinasabi rin umano ng suspek na kaanib siya ng 128th Base Command ng Moro Islamic Liberation Front.
Inaresto ang suspek sa bisa ng mga warrant na inilabas ng iba’t ibang hukuman para sa mga kasong murder, frustrated murder, robbery, attempted murder, at double murder with frustrated murder. Walang inirekomendang piyansa para sa kanya.
Ayon sa pulisya, sangkot umano ang suspek sa ilang malalaking insidente, kabilang ang pag-ambush sa mga pulis sa Shariff Aguak noong Marso 28, 2026 at ang insidente sa Mamasapano.
Dinala muna siya sa ospital para sa medical examination bago inilagay sa kustodiya ng pulisya.
“Criminals must be brought to justice at all cost. No one is above the law. Peace and order is non negotiable, and the rule of law is absolute — protecting the oppressed and holding accountable those who sow violence,” pahayag ni MDSPPO Director Col. Michael John Mangahis.
“To those who defy the law, let this stand as a warning: justice will hunt you down, accountability will find you, and the guardians of peace will never falter. There is no refuge for lawlessness — the law will prevail, always,” dagdag ni Mangahis. Mary Anne Sapico
