MANILA, Philippines – Inaprubahan ng Department of Transportation (DOTr) ang fare increase para sa public utility vehicles (PUVs), na magiging epektibo sa Lunes, Setyembre 28.
Inaprubahan ni Transportation Secretary Giovanni Lopez ang rekomendasyon ng Land Transportation Franchising and Regulatory Board (LTFRB) na alisin ang suspensyon sa fare increase na ipinataw noong Marso 2026.
“It is timely to implement this fare increase to also ensure that there are enough PUVs on the roads and that commuters have available transportation,” ani Lopez.
Sa ilalim ng bagong pamasahe, tataas mula P13 hanggang P14 ang minimum fare ng traditional jeepney para sa unang apat na kilometro, habang may dagdag na P2 sa bawat susunod na kilometro.
Para naman sa modern jeepney, tataas mula P15 hanggang P17 ang minimum fare, na may dagdag na P2.40 kada susunod na kilometro.
Pinaalalahanan ni Lopez ang mga PUV operator na ipagpatuloy ang mandatoryong 20% fare discount para sa mga estudyante, senior citizen at persons with disabilities (PWD).
Kailangan ding ipaskil ng mga PUV na sakop ng fare increase ang bagong fare matrix sa loob ng kanilang sasakyan bago maningil ng bagong pamasahe.
Sinabi ng DOTr at LTFRB na isinailalim sa konsultasyon sa mga transport group ang fare adjustment bago ito inaprubahan.
“We really just need to strike a balance in whatever decision the agency makes. You are our top priority in all the programs we implement at the DOTr,” ani Lopez.
Dumating ang fare hike kasabay ng anunsyo ng ilang transport group na magsasagawa ng tatlong araw na transport strike mula Setyembre 28 hanggang 30. RNT/MDS
