KABACAN, Cotabato-PATAY ang isang punong barangay matapos lumipad ang minamaneho nitong motorsiklo kahapon ng umaga sa bayang ito.
Kinilala ang biktimang si PB Arnel Kabamlan Wagia, 61-anyos, may asawa at residente ng Barangay Aringay, ng naturang bayan.
Batay sa report ng Aringay Municipal Police Station, bandang 10:50AM ng maganap ang insidente sa kalsadang sakop ng Purok Masagana Intersection Poblacion Kabacan.
Lumabas sa imbestigasyon ng pulisya, minamaneho ng biktima ang kanyang Honda beat motorcycle ng bigla na lamang itong nawalan ng kontrol sa manibela .
Posibleng napiga ng biktima ang gasolinador hanggang sa lumipad ito at nasagi ang isang motorsiklo saka ito bumagsak sa sementadong kalsada.
Agad naman dinala sa ospital ang biktima subalit nalagutan din ng hininga habang nilalapatan ng lunas sanhi ng matinding pinsala sa ulo at katawan./Mary Anne Sapico
