MALAYBALAY CITY, Bukidnon — Dedo ang isang barangay kapitan habang nasugatan ang kanyang asawa sa isang pamamaril na yumanig sa kasayahan ng Pasko at Binaki Festival sa Barangay Aglayan, Lunes ng gabi, Disyembre 22.
Kinilala ang biktima bilang si Richard Calo Rama, 48, chairman ng Purok 4A, na idineklarang patay pagdating sa ospital. Ang kanyang asawa na si Trexie Mae del Campo Regacho, 41, ay nagtamo ng sugat mula sa baril at kasalukuyang ginagamot.
Ayon kay Barangay Aglayan Kagawad Peter John Pepito, sakay ng kanilang motorsiklo ang mag-asawa bandang 9:20 p.m. matapos manood ng basketball game nang sila’y sundan at pagbabarilin ng hindi pa kilalang suspek sa Sayre Highway sa Purok 4A. Tumakas ang gunman pagkatapos ng insidente.
Ang pamamaril ay naganap habang ipinagdiriwang ng Barangay Aglayan ang kanilang ikalawang Binaki Festival mula Disyembre 21 hanggang 23, na ginugunita ang tradisyonal na pagkaing binaki bilang simbolo ng kultura at kabuhayan ng barangay.
Patuloy na iniimbestigahan ng mga awtoridad ang motibo sa likod ng insidente. Santi Celario
