MANILA, Philippines – Nagsampa si Vice President Sara Duterte nitong Lunes ng ikalawang perjury complaint laban kay Ramil Madriaga, na umano’y dati niyang aide at nag-akusa sa kanya kaugnay ng ilegal na campaign funding at paghahatid ng pera.
Personal na nagtungo si Duterte sa Taguig City Prosecutor’s Office upang ihain ang reklamo, kasama ang kanyang abogado na si Atty. Salvador Paolo Panelo Jr.
Ayon kay Panelo, ang reklamo ay para sa paglabag sa Article 183 ng Revised Penal Code at may kaugnayan sa supplemental affidavit ni Madriaga na may petsang Abril 11, 2026.
Ayon kay Panelo, nasa humigit-kumulang 1,000 pahina ang reklamo at naglalaman ito ng testimonya ni Duterte at 12 corroborating witnesses, mga dokumento at sertipikasyon ng gobyerno, pati mga mensahe, litrato at public records.
“The complaint, consisting of approximately 1,000 pages, thoroughly exposes Madriaga’s malicious and deliberate falsehoods with sworn testimonies of the Vice President herself and 12 corroborating witnesses, government and other official documents and certifications, and contemporaneous messages, photographs, and public records,” ani Panelo.
Sinabi rin ng abogado na teknikal na hindi na sana kailangan ang ikalawang reklamo dahil sa umano’y “absurd and unverifiable nature” ng mga alegasyon ni Madriaga at dahil mabilis umano itong bumagsak sa pagsusuri.
“However, it had to be done to ensure that Madriaga is held accountable under the law, and to unmask the malicious, baseless, and desperate character of the impeachment effort against the Vice President and of those behind it,” dagdag niya.
Noong Marso 4, nagsampa rin si Duterte ng unang perjury complaint laban kay Madriaga sa parehong tanggapan, at iginiit na “false stories should not be used to confuse the public.”
Si Madriaga, na nagpakilalang dating aide at bagman ni Duterte, ay nagsabing pinopondohan umano ng mga drug dealer at Philippine offshore gaming operators (POGO) ang campaign group na “Inday Sara Duterte is My President (ISIP) Pilipinas.”
Sinabi rin niyang inutusan siya nina Colonel Dennis Nolasco at Colonel Raymond Lachica na maghatid ng apat na duffel bag na bawat isa ay naglalaman umano ng hanggang P35 milyon sa iba’t ibang indibidwal.
Itinanggi nina Duterte at Lachica ang mga alegasyon laban sa kanila. RNT/MDS
