MASBATE City, Philippines – Lehitimo at walang kulay pulitika o media harassment ang isinampa na kasong murder laban sa dalawang media workers ng DyME radio station sa lalawigan ng Masbate.
Ayon kay Ruben Fuentes, presidente ng Masbate Quad Media Society, Inc., batay sa information na isinampa ni Provincial Prosecutor Jeremias Mapula sa Cataingan Regional Trial Court Branch 49 noong Hulyo 2, 2024, ang mga kasong kinahharap nina Benjamin Gigante alyas ‘Ka Ben’ at Jhay Alfaro alyas ‘Ka DJ’ na umano’y renegade member ng MQMSI, kasama sina Bernie Naraja alyas ‘Ka Rem’ at Reymund Dosdos alyas ‘Ka RM’ ay may kaugnayan sa pagpatay sa isang Richard Bauso noong Abril 6, 2024 sa Barangay Taverna, Cawayan.
Sa criminal complaint na may docket no. NPS V-12-PEO78-24E-078, nakasaad na nakitaan ng probable cause ang akusasyon kaya ito isinumite ng piskalya sa korte.
Nabatid na ang pagkakadawit ng mga akusadong sina Gigante at Alfaro sa naturang kaso ay dahil pinaghihinalaang may koneksyon ang mga ito sa armadong komunistang grupo.
Ang mga dahilan nito ay ang kanilang pagbabalita at pagbabahagi ng mga pahayag ng kilusan sa social media sa pamamagitan ng isang Luz Del Mar, na umano’y kilalang miyembro ng makakaliwang grupo.
Ayon kay Fuentes, walang kinalaman ang pulitika sa Masbate sa naturang kaso ng tinawag niyang renegade member ng samahan na kanyang pinamumunuan.
Nilinaw pa ni Fuentes na isa siya sa naghain noon ng kaso laban kay Gov. Kho, “pero nadismis na ng Ombudsman ang mga asunto dahil sa walang pag-sang ayon ang Commission on Audit sa mga detalye ng aking mga bintang, maging sa proseso ng paghain ko ng asunto.
Ayon kay Fuentes, ang mga kamag-anak at awtoridad ang nagsampa ng reklamo sa mga ito sa piskalya na inaksyunan at iniakyat sa korte.
Kaugnay nito, hinikayat ni Fuentes ang kanyang mga kasamahan sa MQMSI na ‘wag magpapagamit sa away-pulitika, panatiliin ang patas na pag-uulat at ‘wag ipagamit ang propesyon sa kasinungalingan. RNT
