PANGASINAN- Tigok ang isang lolong nagmamaneho ng tricycle samantalang sugatan ang 65-anyos na lalaking pasahero nito matapos mabangga ng isang motorsiklo ang kanilang sasakyan sa Brgy. Tempra-Guilig, San Fabian ng lalawigang ito kahapon, November 22.
Ayon sa mga otoridad, ang 76-anyos na driver ng tricycle ay residente ng naturang bayan samantalang ang pasahero nito ay residente ng Mangaldan, Pangasinan.
Sugatan din ang 30-anyos na lalaking residente ng Caba, La Union na nagmamaneho ng kulay itim na Suzuki motorcycle na nakabangga sa naturang tricycle.
Bumibiyahe papuntang kanluran sa barangay road sa naturang lugar ang tricycle para pumasok ng national highway.
Sa pagpasok ng tricycle sa national highway, habang lumiliko ito papuntang kaliwa para bumiyahe papuntang timog na direksyon ay aksidenteng nabangga ito ng motorsiklong mabilis ang takbo papuntang hilagang direksyon.
Resulta nito, nagtamo ng sugat sa iba’t ibang parte ng kanilang katawa ang tatlo na agad na isinugod sa ospital.
Gayunman, ang driver ng tricycle ay idineklarang dead-on-arrival ng umatending doktor. Rolando S. Gamoso
