MANILA, Philippines – Bagsak sa kulungan ang 12 drug suspects matapos maaresto sa isinagawang buy-bust operation na nagresulta sa pagkakalansag ng isang umano’y drug den sa Valenzuela City.
Kinilala ang mga naarestong suspek na sina alyas “Robert,” 54; alyas “Ryan,” 38; alyas “Marvin,” 32; alyas “Joan,” 38; alyas “Maricon,” 42; alyas “Mike,” 48; alyas “Jay,” 19; alyas “Tina,” 40; alyas “Rosty,” 24; alyas “Lyn,” 28; alyas “Chris,” 42; at alyas “Ann,” 60, pawang mga residente ng Brgy. Arkong Bato.
Sa ulat, ikinasa ng pinagsanib na mga operatiba ng PDEA RO-NCR Northern District Office, PDEA RO-NCR RSET 2, Special Enforcement Service, at NPD DDEU ang buy-bust operation laban kay alyas Robert na sangkot umano sa pagbebenta ng ilegal na droga at ginagamit din umano ang kanyang bahay bilang drug den.
Nang tanggapin umano ng suspek ang P500 marked money mula sa isang operatiba ng PDEA na nagpanggap na buyer kapalit ng isang plastic ng shabu, agad siyang dinamba ng mga operatiba dakong alas-12:00 ng hatinggabi sa kanyang bahay sa Sagip St., Brgy. Arkong Bato. Naaktuhan naman sa loob ng bahay ang iba pang mga suspek na gumagamit umano ng droga.
Nakumpiska sa mga suspek ang 20 pirasong plastic sachet na naglalaman ng nasa 15 gramo ng hinihinalang shabu na may standard drug price na P102,000, buy-bust money, at mga drug paraphernalia.
Mahaharap ang mga suspek sa kasong paglabag sa R.A. 9165 o ang Comprehensive Dangerous Drugs Act of 2002. Rene Manahan
