MANILA, Philippines – Nasa 12,000 customers ng Manila Electric Co. (Meralco) ang wala pa ring kuryente ngayong Miyerkules, Hulyo 23 ayon sa pinakahuling abiso ng kompanya.
Apektado pa rin ang ilang lugar sa Cavite, Metro Manila, at Bulacan, kung saan nananatiling binaha ang ilang komunidad.
Nitong Martes, iniulat ng Meralco na 167,000 customers ang nawalan ng kuryente bunsod ng malalakas na pag-ulan at pagbaha na dulot ng Tropical Depression Dante at pinalakas na habagat.
Ayon kay Joe Zaldarriaga, vice president at head ng corporate communications ng Meralco, naka-full alert ang kanilang mga linemen at technical team.
“We remain vigilant as we monitor the current weather conditions that affect our franchise area. We remain fully committed to restoring electricity service to all impacted customers as safely and swiftly as possible,” ani Zaldarriaga.
Kasabay nito, muling nanawagan ang Meralco at ang Department of Energy sa publiko na mag-ingat sa paggamit ng kuryente, lalo na sa mga lugar na binaha.
“We also reiterate our call to continue practicing caution and follow electrical safety guidelines, especially in flood-affected areas,” dagdag pa niya.
Patuloy ang restoration efforts sa mga natitirang lugar na wala pa ring suplay ng kuryente. RNT/JGC
