13 durugista timbog, P161-K ‘bato’ nasamsam sa Bulacan buy-bust ops

BULACAN, Philippines – Arestado ang 13 indibiduwal habang nakasamsam ng P161,160 halaga ng iligal na droga sa magkakahiwalay na buy-bust operation ng pulisya sa lalawigang ito.

Sa report ni PLTCOL Reyson Bagain, hepe ng San Jose Del Monte police station, kinilala ang mga suspek na sina alyas Joel, 53.

Ayon kay Bagain, isinagawa ang operasyon ng Station Drug Enforcement Unit (SDEU) bandang 4:20 ng hapon nitong Oktubre 8 sa Brgy. Sta. Cruz.

Narekober sa operasyon ang marked money at tatlong sachets  ng hinihinalang shabu na may Standard Drug Price (SDP) na P54,400.

Samantala, huli rin sa kaparehong operasyon ng Malolos police station sa pangunguna ni PLTCOL Rommel Geneblazo, ang mga suspek na sina alyas Adan, 27, alyas Cotton, 29 at alyas CJ, 29 bandang 1:45 ng madaling araw nitong Oktubre 9.

Nasamsam sa mga suspek ang pitong sachets na pinaghihinalaang shabu na tumimbang ng 5.6 gramo, may SDP na P38,080 at buy-bust money.

Kaugnay, nasa siyam pang indibiduwal ang naaresto sa kaparehong operasyon ng SDEU ng Santa Maria, Balagtas, San Miguel, Marilao at Obando police station.

Sinasabing nasa 18 sachets na hinihinalang shabu ang kabuuang nahuli na may halagang P68,680 at buy-bust money.

Nahaharap ang mga suspek sa kaukulang kaso habang nakakulong san nasabing istasyong humuli sa kanila. (Dick Mirasol III)