2 barangay sa Navotas, malaya na sa droga

IDINEKLARA ng Philippine Drug Enforcement Agency (PDEA) na drug-cleared na sa ilegal na droga ang dalawa pang barangay sa Navotas City.

Personal na iniabot ni Mayor John Rey Tiangco, kasama ang mga miyembro ng konseho ng lungsod, ang PDEA certificates kina Bagumbayan South Barangay Chairperson Joselito Sulit at North Bay Boulevard North Barangay Chairperson Noel Aviles bilang pagkilala sa tagumpay ng kanilang mga barangay.

“This accomplishment reflects the strong cooperation between the barangays, our law enforcement partners, and the community,” pahayag ni Mayor Tiangco.

“We urge Navoteños to be vigilant and report any suspicious individuals or activities to TXT JRT. Let us continue working together to win this fight and keep our city and people safe,” dagdag niya.

Sa 18 barangay ng Navotas, ang Bagumbayan South at North Bay Boulevard North ang ika-15 at ika-16 na barangay na idineklarang drug-cleared. Kasama sila sa iba pang mga barangay na matagumpay na napanatili ang kanilang drug-cleared status, tulad ng North Bay Boulevard South (NBBS) Dagat-dagatan, NBBS Proper, NBBS Kaunlaran, Navotas East, Navotas West, Tanza I, Tanza II, San Rafael Village, Bagumbayan North, Sipac-Almacen, Bangkulasi, Daanghari, San Roque, at San Jose.

Idineklara ng PDEA ang parehong barangay bilang drug-cleared noong Disyembre 18, 2025, kasunod ng masusing proseso ng pagtatasa at pagpapatunay na nagkumpirma sa kanilang pagsunod sa Seksyon 12 ng Dangerous Drugs Board Regulation No. 4, serye ng 2021. Kabilang dito ang pagtiyak na ang mga drug personality na nasa unified watchlist ng barangay ay nabibigyan ng angkop na interbensyon, pagpapanatili ng isang drug-free workplace, at pagpapatupad ng aktibong adbokasiya laban sa droga ng mga opisyal ng barangay.

Ang mga inisyatibo ng Navotas laban sa droga ay nakaangkla sa programang paggamot at rehabilitasyon na nakabase sa komunidad na kilala bilang Bidahan, na nagbibigay ng rehabilitasyon at pagpapayo, pati na rin ang programang pangangalaga pagkatapos ng rehabilitasyon na tumatagal ng anim at 18 buwan, ayon sa pagkakabanggit.

Bukod sa Bidahan, patuloy na pinalalakas ng pamahalaang lungsod ang kampanya nito laban sa droga sa pamamagitan ng drug awareness at prevention lectures para sa mga mag-aaral na Navoteño, random at mandatory drug testing sa mga empleyado ng city hall at barangay, gayundin sa mga benepisyaryo ng programang Bidahan, at patuloy na drug-clearing sa mga barangay. JOJO RABULAN