ILOILO CITY- Patay ang dalawang bta habang 20 indibidwal ang sugatan nang bumulusok ang isang jeep sa bulubunduking kalsada sa Barangay Cagay, Calinog, Iloilo nitong Martes ng umaga.
Sinabi ni Police Staff Sgt. Edzel Edlang ng Calinog Municipal Police Station na ang mga nasawi ay isang 13-anyos na lalaki at isang 5-anyos na babae.
Ayon kay Edlang, gumulong pababa ang isang pampaseherong jeep na minamaneho ni Yuben, 39, na may sakay na halos 30 pasahero patungo sa bayan, habang tinatahak ang pataas na kalsada. Natumba at nagpagulong-gulong ang sasakyan bago ito huminto.
Dinala ang mga sugatan sa Aleosan District Hospital sa kalapit na bayan ng Alimodian, Iloilo.
Kasalukuyang nakaditene si Yuben sa police station.
Inihayag ni Edlang na hinihintay nila ang desisyon ng mga pamilya ng biktima at mga nakaligtas kung magsasampa sila ng kaso.
Binanggit niya na ang driver ay kaananak ng marami sa nakaligtas at residente rin ng Barangay Cagay, ang boundary area ng Antique province. RNT/SA
