MANILA, Philippines- Sinibak ni Bureau of Corrections (BuCor) Director General Gregorio Catapang sa pwesto ang dalawang deputy officials habang iniimbestigahan ang mga ito sa iba’t ibang alegasyon.
Sinabi ni Catapang nitong Lunes na inatasan niya na imbestigahan sina Deputy Director General for Administration Geraldo Aro at Deputy Director for Operations and Head Executive Assistant Angelina Bautista matapos akusahan ng ilang mga mambabatas sa House Committee on Public Order and Safety hearing noong Aug. 3.
Sinasabing kasama si Aro sa illegal drugs watchlist, habang ayon naman sa ilang mambabatas, si Bautista ang nagmamay-ari ng ilang food suppliers sa isa sa prison facilities.
Iginiit ni Bautista na wala siyang itinatago at bukas sa imbestigasyon upang malinis ang kanyang pangalan.
“To tell you frankly, I ask that I be relieved of my position so as not to taint the good name of our Director General,” giit niya.
Tinanggal si Aro bilang superintendent ng Davao Prison and Penal Farm. Inatasan siyang mag-report sa Office of the Director General, habang ipinag-utos kay Bautista na mag-report sa Office of the Deputy Director General para sa administrasyon para sa wastong disposisyon.
Binigyan ni Catapang si Deputy Director General Al Perreras ng hanggang katapusan ng Agosto upang matapos ang imbestigasyon. RNT/SA
