MANILA, Philippines- Sinampahan na ng kaso ng Land Transportation Office ( LTO) ang dalawang operator ng colorum vehicles makaraang mahuli ng mga operatiba ng PNP sa ginawang operasyon sa Cavite.
Sinabi ni LTO Vigor Mendoza na ang mga nahuling operator ng colorum vehicles na sina Ricky Solayao Cos, 38; at Roberto Bonete Salvador, 52 na pawang mula Trece Martires City Cavite ay kinasuhan ng paglabag sa Republic Act 11659 o Public Service Act.
Nabatid pa sa LTO na ang paghuli sa dalawa ay bunsod ng ipinalabas na arrest warrant ni Judge Regina Paz Ramos-Chavez ng Branch 274 ng Paranaque City Regional Trial Court.
“Ito ay nagpapatunay na seryoso ang inyong LTO para wakasan na ang perwisyong dulot ng mga colorum operators sa ating mga lehitimong kababayan sa sektor ng transportasyon.Patas na lumalaban ang karamihan sa ating mga drivers at operator subalit ang kanilang kinikita ay naapektuhan ng mga ganitong iligal na gawain,” sabi ni Mendoza.
Idinagdag pa ng LTO na 30 porsyento ng kita ng legal operators ng mga pampasaherong sasakyan ang nawawala dahil sa mga colorum na sasakyan. Santi Celario
