PANGASINAN- Patay ang driver at angkas nito matapos sumemplang ang kanilang motorsiklo sa Brgy. Ninoy, Aguilar ng lalawigang ito kahapon, Mayo 2.
Kinilala ng Aguilar Municipal Police Station ang driver ng kulay itim na Yamaha Mio motorcycle na si Ricky Bugayong Guillermo, 42, may asawa, magsasaka at ang angkas nito na si Loreto Mallari Guillermo, 44, may asawa, magsasaka, parehong residente ng Brgy. Bocacliw ng naturang bayan.
Ang naturang motorsiklo ay bumibiyahe sa national road sa naturang lugar papuntang timog na direksyon nang biglang mawalan ng kontrol sa manibela ng sasakyan ang driver hanggang sa sumemplang sa kalsada ang motorsiklo.
Resulta nito, parehong nagtamo ng sugat sa iba’t ibang parte ng kanilang katawan ang driver at angkas nito.
Isinugod ng mga rumespondeng MDRRMO Aguilar personnel ang driver ng motorsiklo sa Mangatarem District Hospital sa Mangatarem, Pangasinan samantalang ang kasama nito ay isinugod naman sa Lingayen District Hospital sa Lingayen, Pangasinan.
Gayunman, ang dalawa ay parehong idineklarang dead-on-arrival ng kanilang mga attending physician. Rolando S. Gamoso
