BOCAUE, Bulacan, Philippines – Dalawang pagawaan ng paputok sa Bocaue at Baliwag City, Bulacan, ang nasabugan nitong mga nakaraang araw, ngunit walang naiulat na nasugatan.
Ayon kay Maj. Jaynalyn Udal, information officer ng Bulacan Provincial Police Office, sumabog ang isang barung-barong na ginagamit bilang pagawaan ng paputok pasado alas-10 ng umaga nitong Martes sa Sitio Caculisan, Barangay Bambang, Bocaue.
Tatlong manggagawa ang nakatakbo at nakaligtas sa insidente. Narekober ng pulisya ang kanilang mga identification card malapit sa isang bodega ng paputok na may karatulang “Seg-Sabel Fireworks.” Hindi umabot sa bodega ang sumunod na sunog.
Nakatanggap naman ang mga awtoridad ng ulat tungkol sa sunog bandang alas-1:45 ng hapon, ngunit mga bakas na lamang ng sunog ang nadatnan ng mga rumespondeng awtoridad.
Nauna rito, sumabog din ang isang pagawaan ng paputok sa Purok 3, Barangay Barangca, Baliwag City, bandang alas-3:50 ng hapon noong Sabado, Oktubre 24. Lahat ng manggagawa ay nakalabas nang ligtas mula sa nasusunog na pasilidad.
Ayon kay Udal, nakontrol ang sunog sa Baliwag bandang alas-4:21 ng hapon at tuluyang naapula alas-4:34 ng hapon.
Patuloy pang iniimbestigahan ng mga awtoridad kung may mga lisensya ang mga may-ari ng dalawang pagawaan upang legal na gumawa ng paputok. RNT/MDS
