MANILA, Philippines – Naaresto ng Bureau of Immigration (BI) ang dalawang Chinese nationals sa magkahiwalay na operasyon sa Luzon at Mindanao dahil sa pagpapanggap bilang mga Pilipino.
Ayon kay Fortunato Manahan Jr., hepe ng BI Intelligence Division, naaresto si Jucan Hong noong Pebrero 2 sa Barangay Bitano, Legazpi City dahil sa pagpapanggap bilang Pilipino upang makakuha ng mga government ID, kabilang ang driver’s license, at magsagawa ng mga negosyo sa lugar.
Kinabukasan, naaresto naman si Qingzhuang Ke, kilala rin sa pekeng pangalang Pilipino na “Jimmy Reyes,” sa Barangay Cuambogan, Tagum City, Davao del Norte.
Nakakuha si Ke ng delayed registration birth certificate sa pekeng Filipino identity, na ginamit niya upang makakuha ng maraming ID, magbukas ng bank account, magparehistro ng sasakyan, at magpatakbo ng warehouse business.
Ang dalawa ay kasalukuyang nasa kustodiya ng BI at haharap sa deportation proceedings matapos maresolba ang kanilang mga kaso. Binigyang-diin ni Immigration Commissioner Joel Anthony Viado na ilegal ang pagpapanggap bilang Pilipino upang makaiwas sa batas o makakuha ng pribilehiyo, at maaaring magdulot ito ng panganib sa kaayusan, patas na ekonomiya, at pambansang seguridad. Dave Baluyot
