MUNTINLUPA, Philippines – Inaresto ng pulisya ang isang 23-anyos na lalaki sa Muntinlupa City dahil sa paglabag sa city ordinance na nagbabawal sa paggamit, pagmamay-ari at pagbebenta ng paputok at pyrotechnic devices sa lungsod.
Kinilala ang suspek sa apelyidong Noble, isang Move It rider at residente ng Santa Cruz, Maynila.
Inaresto siya noong Disyembre 21 sa Lakefront Purok 6, Barangay Sucat, Muntinlupa.
Batay sa imbestigasyon, may residenteng nag-report sa pulisya na may dalang paputok si Noble. Agad siyang dinakip at dinala sa police station.
Nakumpiska mula sa kanya ang isang piraso ng “sawa” (1,000 rounds), limang ream ng Five Star, at 100 piraso ng Kwitis, na may kabuuang halagang P5,200.
Ang Muntinlupa City Ordinance 14-092, na inaprubahan noong 2014, ay nagbabawal sa “the manufacture, display, sale, distribution, possession or use of firecrackers or pyrotechnic devices and such other similar devices and the exploding of firecrackers or other similar explosives within the territorial jurisdiction of Muntinlupa City.”
“lt shall, likewise be unlawful for any person to discharge or explode, or cause to discharge or to explode, any firecrackers, or any other explosive or to use any pyrotechnic device or any such other similar device, at anytime and anywhere within the territory of Muntinlupa City,” ayon pa sa ordinansa.
Ang mga lalabag ay mumultahan ng P1,000 hanggang P1,500 at maaaring makulong ng hanggang anim na buwan.
Para sa unang paglabag, ang parusa ay P1,000 multa “or imprisonment of not more than one (1) month but not less than (2) days or both fine and imprisonment, at the discretion of the Court.”
Maghahain ang pulisya ng reklamo laban kay Noble dahil sa paglabag sa ordinansa (possession of firecrackers) sa Muntinlupa City Prosecutor’s Office.
Muling pinaalalahanan ng pamahalaang lungsod ng Muntinlupa ang publiko tungkol sa ordinansa matapos ang isang 11-anyos na bata na masugatan dahil sa pagsabog ng Piccolo, kung saan inirerekomenda ng mga doktor ang pagputol ng daliri ng bata. RNT/MND
