BULACAN, Philippines – Hinuli ng Philippine National Police Highway Patrol Group (PNP HPG) ang 24 na indibidwal dahil sa umano’y karera ng motorsiklo sa lalawigan ng Bulacan.
Ayon sa ulat ng HPG, nahuli sila Linggo ng gabi sa kahabaan ng Mabalas-Galas-Maasim Bypass Road sa San Rafael.
Sinabi ni HPG spokesperson Lt. Nadame Malang na nag-ugat ang operasyon sa reklamong inihain ng isang concerned citizen hinggil sa insidente noong Agosto 3 kung saan nasugatan ang isang menor de edad matapos tangkaing umiwas ng mga motorcycle racer sa pulisya.
“The police acted on it immediately. During the apprehension, one minor being chased by local PNP units got into an accident and broke their leg,” saad ni Malang.
“The PNP HPG followed up on this to arrest those caught in the video. This is the result of that, the 24 individuals were arrested, including the minors,” dagdag pa niya.
Inilagay sa kustodiya ng Bulacan Provincial Highway Patrol Team ang 12 naarestong indibidwal.
Sinabi ni Malang na sinampahan na sila ng mga pulis ng kaso laban sa mga umano’y alarms and scandals, gayundin ang mga paglabag sa Republic Act 10054, o ang Motorcycle Helmet Act, at Republic Act 11235, o ang Motorcycle Crime Prevention Act.
Nahaharap din sila sa kasong paglabag sa Republic Act 4136, o Land Transportation and Traffic Code.
Samantala, ang 12 menor de edad ay itinurn-over sa Bulacan Social Welfare and Development Office para sa kaukulang disposisyon.
Sinabi ni Malang na 19 na motorsiklo ang nasamsam sa operasyon. RNT/MND
