CEBU, Philippines – Tatlong indibidwal ang inaresto habang nakatakas naman ang itinuturong operator ng isang drug den matapos ang buy-bust operation sa Barangay Sambag II, Cebu City nitong Lunes, Hunyo 15.
Isinagawa ang operasyon ng Philippine Drug Enforcement Agency (PDEA) 7 kasama ang Cebu City Police Office sa Sitio Brupa bandang 11:44 a.m.
Ayon sa mga awtoridad, ang mga naaresto ay sina alias “Romeo” (26), na sinasabing kasabwat, at sina alias “Art” (34) at “Reynel” (28), na umano’y bumibisita lamang sa drug den. Lahat sila ay walang trabaho at residente ng lugar.
Natukoy din na si “Romeo” ay dating naaresto noong 2021 sa kasong droga at kalaunan ay naging plea bargainer.
Samantala, ang target ng operasyon at umano’y operator ng drug den na si alias “Jan-Jan” ay nakatakas at patuloy na pinaghahanap.
Nakumpiska sa operasyon ang humigit-kumulang 15 gramo ng hinihinalang shabu na may tinatayang halagang ₱102,000, kasama ang drug paraphernalia, buy-bust money, at iba pang ebidensya.
Inihahanda na ang mga kaso laban sa mga naaresto sa ilalim ng Comprehensive Dangerous Drugs Act of 2002. RNT/MND
