TEHRAN, Iran – Umatake ang Iran sa tatlong barko at sinamsam ang dalawa sa Strait of Hormuz noong Miyerkules, na lalong nagpatindi ng tensyon laban sa United States.
Naganap ito isang araw matapos palawigin ni Pangulong Donald Trump ang ceasefire habang nananatili ang blockade ng Amerika sa mga pantalan ng Iran.
Ayon sa ulat, halos naputol ang paglabas ng langis sa naturang rutang dinaraanan ng 20% ng global oil supply. Dinala umano ng Iranian Revolutionary Guard ang dalawang barko patungong Iran.
Tumaas na rin ang presyo ng langis, kung saan lumampas sa $100 kada bariles ang Brent crude—35% na pagtaas mula bago ang digmaan—na nagdulot ng pagtaas ng presyo ng gasolina at pagkain sa iba’t ibang bansa.
Sinabi ng European Union energy commissioner na si Dan Jørgensen na malaki ang epekto nito sa ekonomiya, na umaabot sa humigit-kumulang €500 milyon kada araw ang gastos sa Europa.
Kabilang sa mga inatake ang MSC Francesca at Epaminondas, habang isa pang barko ang pinaputukan ngunit walang nasugatan. Kinondena ng Panama ang pag-agaw sa kanilang rehistradong barko.
Ayon naman sa White House, hindi umano nilabag ng Iran ang ceasefire dahil hindi pag-aari ng US o Israel ang mga barkong nasamsam.
Mahigit 30 na ang naitalang pag-atake sa mga barko sa rehiyon mula nang magsimula ang digmaan noong Pebrero 28.
Patuloy ang tensyon sa dagat kahit may ceasefire, at maaaring lalo pang lumala kung walang kasunduang diplomatiko.
Samantala, sinabi ng Iran na hindi nito bubuksan muli ang Strait of Hormuz hangga’t may blockade ang US, at wala pa ring kasiguraduhan kung kailan muling magsisimula ang usapan sa pagitan ng dalawang bansa. RNT/MND
