MANILA, Philippines – HINARANG ng Bureau of Immigration (BI) ang tatlo pang foreign sex offenders na pinagbawalan na makapasok sa bansa sa Ninoy Aquino International Airport (NAIA) dahil sa pagiging undesirable alien.
Sinabi ni Immigration Commissioner Norman Tansingco na naharang ang tatlong pasahero sa NAIA terminal 1 noong nakaraang linggo nang dumating sila at humingi ng admission bilang mga turista sa bansa.
Nabatid sa BI na si Jeffrey William Jewitt, 42, ay hindi pinasok noong Abril 5 sa kanyang pagdating sakay ng Korean Airlines flight mula Incheon, South Korea makaraang makatanggap ng impormasyon mula sa border control at intelligence unit (BCIU) ng BI na nahatulan ito noong 2012 dahil sa sex offense sa isang korte sa Illinois.
Siya ay hinatulan sa dalawang bilang ng pagdukot sa bata at sekswal na pang-akit sa isang 16-anyos na babae at isang bilang ng sekswal na pagsasamantala sa isang 12-taong-gulang na bata.
Noong Abril 7, ang Amerikanong si Charles David James Weatherall, 32, ay tinanggihang pumasok pagkatapos niyang dumating sa pamamagitan ng isang Air China flight mula sa Beijing.
Sinabi ng BI-BCIU na si Weatherall ay nahatulan ng child pornography dahil sa pagkakaroon ng mga malaswang larawan ng mga bata sa United Kingdom.
Noong Abril 8, isa pang Amerikano na nagngangalang Momodu Wurie Jalloh, 28, ang pinabalik ng kaniyang pinanggalingan matapos dumating sakay ng flight ng Saudia Airlines mula Jeddah, Saudi Arabia.
Ayon sa BI-Interpol, si Momodu ay nahatulan sa Virginia dahil sa aggravated sexual assault dahil sa kawalan ng kakayahan kung saan ang biktima ay isang 21 taong gulang na babae.
Sinabi ni Tansingco na ang tatlong dayuhan ay inilagay sa blacklist ng immigration.
Sa ilalim ng immigration act, ang mga dayuhang nahatulan ng mga krimen na may kinalaman sa moral turpitude ay awtomatikong pinagbabawalan na makapasok sa bansa.
“As gatekeepers of the country, immigration officers are chiefly responsible for seeing to it that unwanted aliens are immediately turned away upon arriving in any of our international ports of entry,” giit ni Tansingco. Jay Reyes
