MANILA, Philippines – Sinabi ng Pasig City Police Station noong Huwebes, Oktubre 16, na tatlong lalaki, pawang nasa edad 30, ay mahaharap sa patung-patong na kaso kasunod ng isang viral video na nagpapakitang bigla silang pumasok sa isang bahay at pisikal na sinasaktan ang apat na biktima, kabilang ang tatlong menor de edad, kung saan ang isa ay ang sinasabing 13-anyos na kasintahan ng isa sa mga suspek.
Kinilala ni Pasig City Police Station chief Col. Hendrix Mangaldan ang mga suspek na sina “Dek,” “Jac,” at “Rick,” na pawang miyembro ng True Brown Style (TBS) fraternity.
Naganap ang insidente noong Setyembre 23 sa Barangay Pinagbuhatan at kamakailan lamang ay nag-viral sa social media, na nag-udyok sa mga tauhan ng Women and Children Protection Desk (WCPD) na makipag-ugnayan sa mga barangay desk officer upang mahanap at makilala ang mga biktima.
Noong Oktubre 15, pumunta sa istasyon ang sinasabing 13-anyos na kasintahan, dalawang 16-anyos na biktima, at isang nasa hustong gulang na biktima para pormal na iulat ang insidente.
Sinabi nila sa mga imbestigador na tumatambay lang sila sa bahay ng isa sa kanilang mga kaibigan nang biglang sumulpot ang mga suspek, sumisigaw at sa hindi malamang dahilan ay pinagbubugbog sila.
Sa viral video, makikita ang mga suspek na nagwawala at tila may bitbit na baril, na kalaunan ay napag-alamang laruan, at pinaggugulpi ang mga biktima.
Matapos maiulat ang insidente, sinabi ng mga awtoridad na boluntaryong pumunta ang mga suspek sa istasyon para sa isang clarificatory interview.
Sa panayam, sinabi ng pulisya na inamin ni “Dek” na may relasyon siya sa 13-anyos na babae.
Sinabi ni Dek na pagkatapos ng ilang mga bigong pagtatangka na makipagkita sa kanyang kasintahan, nagalit siya at nagpasya na hanapin siya sa tulong ng kanyang mga ka-frat.
Nang malaman na siya ay nasa nasabing lokasyon, pumunta sila sa bahay kung saan sinaktan nila ang mga biktima.
Noong Oktubre 16, sinabi ni Mangaldan sa isang press conference na ang mga reklamo gaya ng grave threats, physical injuries, at acts of lasciviousness, na lahat ay may kaugnayan sa Republic Act 7610, ay inihanda para sa pagsasampa laban sa mga suspek sa Office of the City Prosecutor, Pasig City.
Sinabi ng Pasig City Police Station na kinokondena nito ang anumang anyo ng karahasan at buong-buo itong nakatuon sa pagtataguyod ng hustisya at pagtiyak ng kapayapaan at kaayusan sa lungsod. RNT/MND
