MANILA, Philippines – Sinimulan na ng Department of Social Welfare and Development (DSWD) na i-enroll ang 300,000 karagdagang household beneficiaries sa Walang Gutom Program (WGP), isang pangunahing anti-poverty initiative ng administrasyon ni Pangulong Ferdinand R. Marcos Jr.
Inihayag ni Undersecretary Edu Punay ng DSWD’s Innovation and Program Development Group (IPDG) na makumpleto ng mga bagong benepisyaryo ang 600,000 target households para sa taong ito.
“(Since) last year, we have served 300,000 household beneficiaries in 22 provinces from 10 regions. Now, we have onboarded (an) additional 300,000 beneficiaries,” ayon kay Undersecretary Punay.
“Before the end of the year, 600,000 na po ang ating ise-serve sa programang ito — 600,000 household beneficiaries sa 12 rehiyon at mas maraming probinsya na po.”
Ayon kay Punay, ang pagpapalawak ay suportado ng paglabas ng mga pondo sa ilalim ng Asian Development Bank (ADB) loan agreement bilang bahagi ng Reducing Food Insecurity and Undernutrition with Electronic Vouchers (REFUEL) Project.
“The funding provided by the national government in the General Appropriations Act amounted to PHP1.9 billion. This is only sufficient to serve 50,000 beneficiaries for one year. Therefore, our economic managers strategized by negotiating and arranging a loan agreement with the ADB,” aniya.
Ang proyektong REFUEL ng DSWD ay ipinatupad katuwang ang ADB, Agence Française de Développement (AFD), at ang OPEC Fund for International Development (OFID).
Nilalayon nitong tulungan ang 750,000 kabahayan sa 22 probinsya.
Ang proyekto ay magbibigay sa mga sambahayan na ito ng PHP3,000 bawat buwanang food credits, na magagamit sa pagbili ng mga masusustansyang pagkain mula sa DSWD-accredited na mga tindahan.
Itinampok ni Punay ang mga positibong resulta ng WGP, na binanggit ang mga natuklasan mula sa Social Weather Stations (SWS).
Ayon sa survey ng SWS, bumaba ng 7.2 porsiyento ang insidente ng gutom sa mga benepisyaryo ng WGP sa loob ng anim na buwan mula Oktubre 2024 hanggang Marso 2025.
Batay sa datos ng SWS, bumaba ang insidente ng involuntary hunger sa mga benepisyaryo ng WGP sa 41 porsiyento noong Marso ngayong taon mula sa 48.7 porsiyento noong Oktubre 2024. RNT/MND
