MANILA, Philippines- Apat katao ang inaresto dahil sa pag-operate ng campsite sa loob ng protected forest reserve sa Tanay, Rizal sa kabila ng paglabas ng cease and desist order ng Department of Environment and Natural Resources (DENR) , sinabi ng National Bureau of Investigation (NBI).
Kinilala ng NBI ang mga naaresto na sina Melisa Bendanillo Jose, Ana Marie D. Olitoquit, Leandro A. Catiang, at Ronwell Novilla.
Sinabi nito na sina Jose, Catiang, at Novilla ay kinasuhan ng paglabag sa Section 20 (o) ng Republic Act (RA) No. 7586, ang National Integrated Protected Area System Act of 1999.
Sina Olitiquit at isang at-large respondent na si Meldred Canoy Bendanillo, ay kinasuhan ng mga paglabag sa Section 20 (o) at (g) ng RA 7586, sinabi rin nito.
Naaresto ang apat na suspek noong Hulyo 17 sa loob ng Kaliwa River Forest Reserve (KRFR) sa Tanay, Rizal, ng mga operatiba ng NBI Rizal District Office (NBI-RIZDO).
Sinabi ng NBI na ang KRFR ay isang lugar na idineklara bilang protektado sa bisa ng Presidential Proclamation No. 573 series of 1969.
Inihayag nito na ang operasyon ay ginawa sa kahilingan ng Municipal Environment and Natural Resources Office ng Tanay (MENRO-Tanay) at Department of Environment and Natural Resource – Provincial Environment and Natural Resources Office – Rizal (DENR-PENRO – Rizal).
Anito pa, ang Treasure Mountain at/o Marahuyo Eco Park at/o Marahuyo Campsite at/o TM Marahuyo (Treasure Mountain) ay ang establisyimento na lumalabag sa environmental laws sa lugar.
Ang Cease and Desist Order ay inilabas noong Nov. 6, 2020, ng DENR. Jocelyn Tabangcura-Domenden
