ILOILO CITY- Nakumpiska ng mga awtoridad ang hinihinalang shabu na nagkakahalaga ng P2.9 milyon mula sa apat na tulak sa buy-bust operations nitong Abril 9 at 10 sa bayan ng Estancia sa lalawigan ng Iloilo.
Kinilala ng kapulisan ang mga suspek na sina Jackie, Lester, Joeffrey, at Salmar.
Nakuhanan si Jackie ng P1.36 milyong halaga ng shabu noong Abril 10.
Naaresto ang 43-anyos na si Jackie ng Iloilo Police Provincial Office-Provincial Drug Enforcement Unit (IPPO-PDEU) sa ilalim ni Police Major Ahlie Estember. Katuwang ng IPPO-PDEU ang Estancia Municipal Police Station, 2nd Iloilo Provincial Mobile Force Company, at Iloilo Maritime Police Station.
Pinuri ni Iloilo police chief Police Col. Ronaldo Palomo ang pagkakaaresto sa lady drug suspect na itinuturing na high-value individual sa illegal drugs trade sa Estancia.
Nadakip naman si Lester at mga kasamahan niya noong Abril 9, kung saan nasamsam sa kanila ang P1.53 milyong halaga ng shabu.
Pinangunahan ni PRO-6 Regional Drug Enforcement Unit (RDEU-6) ang operasyon.
Binati ni PRO-6 director Police Brig. Gen. Jack Wanky ang operating units sa kanilang tagumpay.
“Let this success inspire us to further safeguard our communities and exert more effort to defeat the menace of illegal drugs,” wika ni Wanky.
Nahaharap mga suspek sa drug-related charges. RNT/SA
