CABANATUAN CITY, Nueva Ecija — Limang dayuhan ang inaresto ng Bureau of Immigration (BI) sa magkakahiwalay na intelligence-driven operations sa ilang lalawigan sa Northern Luzon noong Hulyo 30 at 31.
Ayon kay Immigration Commissioner Joel Anthony Viado, kabilang sa mga nadakip sina Indian nationals na sina Sahil Kumar, 23, at Sharendran Doss Devadoss, 29; Chinese national Huang Pengpeng, 39; at South Korean nationals na sina Jin Su Deok, 51, at Oh Eiseok, 49.
Arestado si Kumar sa Cabanatuan City, Nueva Ecija matapos mapatunayan ng BI intelligence operatives na overstaying siya sa bansa at wala ring maipakitang balidong pasaporte o immigration document.
Ayon naman sa ilang residente sa lugar, sinasabing sangkot din si Kumar sa isang ilegal na “5-6” lending business.
Samantala, nahuli si Devadoss sa Balagtas, Bulacan matapos mabigong magpakita ng balidong pasaporte o immigration documents. Kinumpirma rin ng rekord ng BI na lumampas na siya sa itinakdang panahon ng kanyang pananatili sa Pilipinas.
Sa Subic, Zambales, inaresto naman si Huang matapos mapatunayang overstaying din ito sa bansa.
Sa Angeles City, Pampanga, magkahiwalay na inaresto sina Jin at Oh matapos mahuling aktibong namamahala sa isang restaurant kahit wala umanong kaukulang visa at work authorization. Nabigo rin ang dalawa na magpakita ng balidong immigration documents nang inspeksyunin ng mga operatiba ng BI.
Dinala ang limang dayuhan sa pangunahing tanggapan ng BI sa Maynila para sa booking, dokumentasyon at pagsisimula ng deportation proceedings.
Binigyang-diin ni Viado na hindi papayagan ng pamahalaan na maging kanlungan ang Pilipinas ng mga dayuhang sadyang lumalabag sa immigration laws.
“Whether they are overstaying, working without authority, or hiding their true immigration status, they will be located through intelligence-driven operations, arrested, and deported in accordance with the law,” ani Viado.
Ayon sa BI chief, magpapatuloy ang intelligence-driven operations sa iba’t ibang bahagi ng bansa upang matiyak ang integridad ng immigration system at maprotektahan ang mga hangganan ng Pilipinas. JAY Reyes
